Компания туралы

«Қазақстан атом электр станциялары» ЖШС (ҚАЭС) — 2014 жылы Қазақстан Республикасында атом электр станцияларын салу жөніндегі бірінші кезектегі іс-шаралар жоспарына сәйкес (ҚР Премьер-Министрінің 2014 жылғы 4 мамырдағы № 60-ө өкімі) АЭС салу бойынша жобаалды (ТЭН) және жобалық (жобалау-сметалық) құжаттаманы әзірлеуді қамтамасыз ету, сондай-ақ Қазақстан Республикасында АЭС салу жұмыстарын ұйымдастыру үшін құрылған мемлекеттік компания.

Бұрын ҚАЭС «Самұрық-Қазына» ұлттық әл-ауқат қоры» АҚ-ның еншілес кәсіпорны болған, алайда Қазақстан Республикасы Президентінің қаулысына сәйкес компания Қазақстан Республикасының Атом энергиясы жөніндегі агенттігінің басқаруына берілді.

Компания атом электр станцияларын салу жобаларын дайындау, жобалау және іске асыру, сондай-ақ атом энергетикасын дамыту үшін қажетті инфрақұрылымды құру жөніндегі оператор функцияларын атқарады.

ҚАЭС қызметінің негізгі мақсаты — энергетикалық қауіпсіздікті нығайтуға және Қазақстан экономикасының тұрақты дамуына бағытталған заманауи және қауіпсіз атом энергетикалық инфрақұрылымын құру.

ҚАЭС штаты бейінді білімі және атом саласы мен дәстүрлі электр энергетикасында жұмыс тәжірибесі бар мамандармен жасақталған. Қазіргі уақытта компания Мемлекет басшысының 2021 жылғы 1 қыркүйектегі «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауын іске асыру жөніндегі жалпыұлттық іс-шаралар жоспарына сәйкес АЭС салу мерзімдері, орны және қуат көлемдері бойынша ғылыми негізделген ұсыныстар дайындауда.

Миссия

Қазақстанды таза әрі қолжетімді ядролық энергиямен қамтамасыз ету, экономиканың тұрақты дамуына, көміртек ізін азайтуға және
Қазақстан Республикасының энергетикалық егемендігін ондаған жылдарға нығайтуға негіз қалау.

• Энергетикалық қауіпсіздік: Тұрақты даму үшін елді сенімді әрі тұрақты электр энергиясы көзімен қамтамасыз ету.
• Экологиялық жауапкершілік: Қазақстанда көміртексіз ядролық генерацияны дамыту арқылы CO₂ шығарындыларын азайту.
• Технологиялық көшбасшылық: Озық ядролық технологияларды енгізу және атом саласында ұлттық құзыреттерді қалыптастыру.

«ҚАЭС» ЖШС қызмет түрлері

• Атом өнеркәсібі және атом энергетикасы объектілері үшін сәулет саласындағы қызмет.
• Атом өнеркәсібі мен атом энергетикасы объектілеріне инженерлік іздестіру және осы салада техникалық кеңес беру саласындағы қызмет.
• Атом энергиясын бейбіт мақсатта пайдалану саласындағы зерттеулер мен тәжірибелік әзірлемелер.
• Электр қуатының жүктемені көтеруге дайындығын қамтамасыз ету, электр қуатын реттеу және резервтеу.